Cymerwch rhan
Gwnewch wahaniaeth heddiw
Does dim rhaid i chi fod yn arbenigwr ar fioamrywiaeth i gymryd rhan… mae rhoi help llaw i fyd natur o fewn cyrraedd pawb! Gall gwneud pethau syml a hawdd wneud gwahaniaeth mawr i fywyd gwyllt. A phe byddai pob un ohonom yn gwneud un peth bach syml, gyda’n gilydd fe wnaem wahaniaeth mawr.
Sut y gallwch chi wneud gwahaniaeth
Gwnewch eich gorau i hyrwyddo bywyd gwyllt, yn eich cartref, yn eich gwaith ac yn eich cymuned. Gall y sefydliadau sy’n bartneriaid i ni roi syniadau a chyfleoedd gwych i chi gymryd y camau cyntaf. Dewch i wybod peth sy’n digwydd yn eich bro; edrychwch ar wefan eich awdurdod lleol a’ch parc cenedlaethol am fwy o fanylion. Rhowch gynnig ar y gweithgareddau isod i gael blas o’r hyn sydd gan fywyd gwyllt i’w gynnig! Angen cyngor ymarferol? Ewch i wefan Wild About Gardens am fwy o wybodaeth.
- Plannwch goed a phlanhigion brodorol yn eich gardd
- Defnyddiwch gyn lleied â phosibl o blaladdwyr, neu ddim o gwbl
- Crëwch lyn
- Gadewch i bentyrrau o goed bydru
- Crëwch lefydd bwydo i adar a phryfed
- Crëwch bentwr compost
- Crëwch safle nythu a llochesi ar gyfer bywyd gwyllt
- Gosodwch gasgen ddŵr i gasglu dŵr glaw ar gyfer planhigion
- Cefnogwch waith asiantaethau diogelu bywyd gwyllt yn eich ardal trwy roi cyfraniad, gwirfoddoli neu siarad o’u plaid
Gwnewch Le i Fyd Natur
Mae gan BBC Breathing Places syniadau gwych ar gyfer torchi eich llewys a chreu eich cornel natur eich hun – ar stepen eich drws. Does dim angen llawer o le nac amser arnoch, ewch allan gyda’ch plant, eich ffrindiau, eich teulu, eich cymdogion neu ar eich pen eich hun, a chael hwyl yn rhannu lle gyda byd natur. Bydd yn rhoi rhywle i chi gael eich gwynt atoch. Dydi o byth yn ddiflas, ac os ydych chi’n garedig wrth fyd natur bydd byd natur yn garedig wrthych chi. Felly lle’r ydych chi am wneud lle i anadlu?
Gallwch greu ardal mor fawr neu mor fach ag y dymunwch ar gyfer bywyd gwyllt ac mae’r taflenni Gwneud Lle i Fywyd Gwyllt a gynhyrchwyd gan dîm ecoleg Bro Morgannwg yn lle gwych i gychwyn. Mae pob un yn llawn i’r ymylon o syniadau ymarferol, o greu dôl o flodau gwyllt i adeiladu bocsys nythu a chartrefi ar gyfer draenogod.
Archwiliad o Fioamrywiaeth y Gymuned
Mae’n bosib mai cynnal archwiliad o fioamrywiaeth y gymuned fydd un o’r prosiectau mwyaf gwerthfawr y bydd eich cymuned leol yn ei gyflawni fyth. Gellir gwneud defnydd da o’r wybodaeth y bydd eich cymuned yn ei chasglu er mwyn gwella eich amgylchedd lleol a bywydau’r bobl sy’n byw yno. Mae modd i chi lawrlwytho llawlyfr am fioamrywiaeth i’ch helpu gyda’r broses archwilio. Bydd cymryd rhan yn newid bywydau am byth ac yn cynyddu gwybodaeth eich cymuned am ei threftadaeth naturiol. Ewch i wefan Siopau Gwyddoniaeth Cymru i ddysgu mwy am y ffordd y gallwch gymryd rhan.